Түркістанда Қазақстан Республикасының Мемлекеттік рәміздер күні жоғары деңгейде аталып өтті

Түркістан қаласында 4 маусым – Қазақстан Республикасының Мемлекеттік рәміздер күніне орай Мемлекеттік ту көтеру рәсімі ұйымдастырылды. Саяси-мәдени маңызы жоғары іс-шараға Түркістан облысының әкімі Нұралхан Көшеров, аймақтың зиялы қауым өкілдері, еңбек ардагерлері, мәслихат депутаттары, мемлекеттік орган басшылары, қоғам белсенділері, спорт саңлақтары мен жастар және қала тұрғындары қатысты.

Салтанатты рәсім аясында Қазақстан Республикасының Мемлекеттік Туы көкке көтеріліп, шараға жиналған жұртшылық бір кісідей Мемлекеттік Әнұранды шырқады. Бұл шара өңірдегі ел бірлігі мен мемлекеттік нышандарға деген жоғары құрметтің айқын көрінісіне айналды.

Ынтымағы жарасқан жиында облыс әкімі Нұралхан Көшеров аймақ тұрғындарын айтулы мерекемен құттықтап, бұл күннің тарихи әрі рухани маңыздылығын атап өтті.

«4 маусым – Тәуелсіз Қазақстанның айбынын айқындайтын, елдігіміз бен егемендігімізді әлемге танытатын ерекше күн. 1992 жылы дәл осы күні Туымыз, Елтаңбамыз бен Әнұранымыз ресми түрде бекітіліп, тарихымыздың жаңа парағы жазылды. Көк байрағымыз – бейбітшілік пен азаттықтың белгісі, Елтаңбамыз – ел тұтастығының нышаны, ал Әнұранымыз – халқымыздың асқақ рухының көрінісі. Бүгінде Қазақстанның Көк туы халықаралық ареналарда, Олимпиада төрінде биікте желбіреп келеді. Оларды құрметтеу – әр азаматтың абыройлы борышы», - деді облыс басшысы

Мерекелік бағдарлама отаншылдық рухты асқақтататын патриоттық әндермен жалғасып, тұрғындарға көтеріңкі көңіл-күй сыйлады.

Айта кету керек, Түркістан облысында өскелең ұрпақты отансүйгіштікке тәрбиелеу және мемлекеттік рәміздерді ұлықтау бағытындағы жұмыстар жүйелі түрде жүзеге асырылып келеді. Осы бастамалардың аясында ағымдағы жылы облыстың Мақтаарал, Ордабасы және Сауран аудандарында зәулім Рәміздер алаңы ресми түрде пайдалануға берілді.