Жер шары халқының 42 пайызы ми мен ішек байланысының бұзылуынан зардап шегеді

Халықаралық зерттеушілер тобы психологиялық күйзеліс пен асқазан-ішек жолдарының бұзылуы арасындағы тікелей байланысты анықтады, деп хабарлайды Kursiv.kz. Ғылыми мәліметтерге сәйкес, емтихан алдындағы асқазанның ауырсынуы немесе эмоционалдық жүктеме кезіндегі жүректің айнуы уақытша реакция емес, Жер шары халқының 42 пайызға жуығы зардап шегетін күрделі патологиялық жағдай болып табылады.

Гастроэнтерология профессоры Агата Мулактың мәлімдеуінше, іштің кебуі мен ауырсыну белгілері тек психологиялық сипатқа ие емес. Бұл бұзылулар биологиялық факторлардың, депрессиялық жағдайлардың және адамның әлеуметтік ортадағы функцияларының өзара әсерлесуі нәтижесінде дамиды. Қазіргі таңда бас миы мен ішектің өзара байланысының бұзылуы гастроэнтерология саласындағы ең көп таралған клиникалық мәселелердің бірі ретінде танылып отыр.

Заманауи медицинада ішек тек тамақ қорыту мүшесі ғана емес, бүкіл ағзаның қызметін реттеуге қатысатын белсенді жүйе ретінде қарастырылады. Бұл үдеріске жүйке және гормоналды жүйелер, иммундық жасушалар, сондай-ақ асқазан-ішек жолдарын мекендейтін миллиардтаған микроорганизмдерден тұратын ішек микробиотасы қатысады.

Профессор Мулактың түсіндіруінше, созылмалы стресс бас миы мен асқазан-ішек жолдары арасындағы нейрогуморальды байланысты бұзып, ішектің моторикасына, висцеральды гиперсезімталдығына және ішек барьерінің өткізгіштігіне теріс әсерін тигізеді. Ұзақ мерзімді психологиялық қысым ішек микрофлорасының құрамын өзгертіп, қабыну үдерістерін күшейтеді, бұл пациенттердің өмір сүру сапасының төмендеуіне әкеп соқтырады.

Сонымен қатар зерттеуде әлеуметтік-мәдени факторлардың маңыздылығы атап өтілген. Жұмыстағы шамадан тыс жүктеме, созылмалы қаржылық тұрақсыздық, әлеуметтік қолдаудың жеткіліксіздігі немесе ортадан оқшаулану сезімі стресс деңгейін арттыратын негізгі детерминанттар болып табылады. Түрлі мәдениеттерде асқазан-ішек жолдарының проблемаларын ашық талқылауға қатысты әлеуметтік шектеулердің (табу) болуы науқастардың медициналық көмекке уақтылы жүгінуіне кедергі келтіреді.

Бұған дейін жүргізілген ірі көлемді зерттеулердің нәтижесі бойынша, антибиотиктерді қабылдаудың бір ғана курсы ішек микрофлорасының құрамындағы өзгерістерді 8 жылға дейін сақтап, ағзаның қызметіне ұзақ мерзімді әсер ететіні анықталған болатын.