10 миллион адам көрген аңыз қойылым Қазақстанға келді: Бұл шоу несімен ерекше?

Астанада әлемге әйгілі Cirque du Soleil компаниясының OVO шоуының премьерасы өтті. Қазақстан алғаш рет бұл қойылымның әлемдік гастрольдік маршрутына енді. 17 жылдан бері көрсетіліп келе жатқан шоу әлемнің 50-ге жуық елінде ұсынылып, 10 миллионнан астам көрерменнің ықыласына бөленген.

«Барыс Аренада» өткен қойылым жәндіктер әлеміндегі оқиғаларды баяндайды. Бағдарлама ерекше акробатикалық нөмірлерімен ерекшеленеді. Көрермендер алып қозғалмалы жапырақ үстіндегі трюктерді, дене икемділігінің шегін көрсеткен өнерді, ультракүлгін жарықтағы ерекше шоуды және әсерлі әуе акробатикасын тамашалады.

Шоуға әлемнің 25 елінен келген 100-ден астам маман қатысады. Сахнада 53 әртіс өнер көрсетеді. Олардың қатарында Олимпиада ойындарының қатысушылары, халықаралық чемпиондар, кәсіби акробаттар мен музыканттар бар.

Cirque du Soleil көркемдік директоры Олаф Трибель әр шоу бірнеше жыл дайындалатынын айтты:

«Жаңа қойылым идеясы пайда болған сәттен бастап премьераға дейін әдетте үш жыл өтеді. Алдымен режиссер мен шығармашылық топ концепция мен сюжетті әзірлейді, кейін жарық, декорация дизайнерлері мен композитор қосылады. Шамамен бір жыл бұрын кастинг басталады, кейін әртістер Монреальда қарқынды дайындықтан өтеді. Әр костюм мен декорация арнайы сол шоу үшін жасалады. Бұл — жүздеген маманның көпжылдық еңбегінің нәтижесі».

Ұйымдастырушылардың мәліметінше, OVO шоуы Астанада 7 маусымға дейін жалғасады. Одан кейін қойылым алғаш рет Алматыға барып, 11–14 маусым аралығында «Алматы Аренада» өтеді. Қазақстан бойынша барлығы 14 қойылым жоспарланған. Ұйымдастырушылар бұл шоуды 70 мыңнан астам көрермен тамашалайды деп күтіп отыр.

Биыл 40 жылдан астам тарихы бар Cirque du Soleil компаниясы әлемнің түрлі елдерінде бір уақытта 17 шоу көрсетуді жоспарлап отыр. Компания құрылғаннан бері оның қойылымдарын әлем бойынша 400 миллионнан астам адам тамашалаған.