Түркістан облысында тағы бір отбасы үшеммен толықты

Түркістан облысында ана мен бала денсаулығын қорғау және аймақтағы туу көрсеткішін арттыру бағытында атқарылып жатқан жүйелі жұмыстардың кезекті оң нәтижесі тіркелді. Өңірдегі жоғары демографиялық өсім қарқыны аясында Түркістан облыстық №2 облыстық перинаталдық орталығында 2026 жылдың алғашқы үшемі дүние есігін ашты, деп хабарлайды Түркістан облысының әкімдігі.

Медициналық мәліметтерге сәйкес, көпұрықты жүктіліктің 32-аптасында мерзімінен бұрын басталған босану процесіне байланысты, дәрігерлер консилиумының шұғыл шешімі қабылданды. Ана мен нәрестелердің өміріне төнген қауіптің алдын алу мақсатында білікті мамандар жедел түрде кесарь тілігі әдісімен хирургиялық ота жасап, үш қыз баланы аман-есен босандырып алды.

Шала туған нәрестелердің алғашқы антропометриялық көрсеткіштері төмен деңгейде тіркелді. Бірінші сәбидің салмағы - 1775 грамм, екіншісі - 1990 грамм, ал үшіншісі - 1850 граммды құрады. Мерзімінен бұрын жарық дүниеге келгендіктен, балалардың ағзасы сыртқы ортаға бейімделмеген және тыныс алу жүйесі қосымша қолдауды қажет етті. Осыған байланысты, алғашқы минуттардан бастап нәрестелер перинаталдық орталықтың реанимация және қарқынды терапия бөлімшесіне, кейіннен арнайы күтімді қажет ететін нәрестелер патологиясы бөлімшесіне ауыстырылды.

22 тәулікке созылған үздіксіз медициналық бақылау, арнайы инкубаторлық күтім және неонатолог-дәрігерлердің кешенді терапиясының арқасында балалардың денсаулығы толықтай тұрақтанды. Ауруханадан шығару сәтінде үшемдердің салмағы тиісінше 2018 грамм, 2010 грамм және 2008 граммға жетіп, өздігінен қоректену және физиологиялық даму көрсеткіштері қалыпқа келді. Бақытты отбасы сәбилерге Сафия, Садия және Самия есімдерін берді.

Үшемдердің анасы - 38 жастағы Оринбаева Турсунай, мамандығы дефектолог-логопед және мүмкіндігі шектеулі балалармен жұмыс істейді. Ал әкесі - Мамуржан Оринбаев, жалпы орта мектепте еңбек пәнінің мұғалімі болып қызмет атқарады. Бұл отбасы бұған дейін де үш баланы (екі қыз және бір ұл) тәрбиелеп отырған болатын. Жаңадан қосылған үшеммен бірге отбасындағы бала саны алтыға жетіп, олар көпбалалы отбасы мәртебесін иеленді.

Анасының айтуынша, жүктіліктің 14-аптасында №2 облыстық перинаталдық орталықтың Ана мен баланы қорғау бөлімінде ультрадыбыстық зерттеу (УДЗ) кезінде дәрігерлер үшем күтіп отырғанын айтқан. Бұл хабарды естіген сәтте отбасында үлкен толқыныс пен қобалжу болғанымен, медицина қызметкерлерінің кәсіби қолдауы сенімділік ұялатқан.

Түркістан облысы туу көрсеткіші және демографиялық өсім деңгейі бойынша республикада алдыңғы қатарда келеді. №2 облыстық перинаталдық орталықтың ресми статистикалық мәліметіне сүйенсек, 2024 жылы бұл мекемеде 3 үшем дүниеге келген болатын. Ал екі мың жиырма алтыншы жылдың басынан бері орталықта жалпы саны 1810 нәресте өмір есігін ашса, соның ішінде 35 егіз және жыл басынан бергі алғашқы үшем ретінде осы сәбилер тіркеліп отыр.

Мұндай күрделі жағдайдағы жүктілікті сәтті басқару және шала туған нәрестелерді аман-есен өмірге бейімдеу аймақтағы ана мен бала денсаулығын қорғау жүйесінің, заманауи медициналық технологиялардың және ақ халатты абзал жандардың жоғары кәсіби біліктілігінің айқын көрінісі болып табылады. Салтанатты түрде перзентханадан шығарып алу рәсімінде Оринбаевтар отбасы облыстық денсаулық сақтау саласының қызметкерлеріне, ота жасаған хирургиялық топқа және нәрестелерді күтіп-баптаған неонатологтарға өздерінің шексіз ризашылығын білдірді.