Сирек кездесетін Эбола вирусын жоятын 3 дәрі сынақтан өтпек

Дүниежүзілік денсаулық сақтау ұйымы (ДДҰ) Эбола вирусының «Bundibugyo» штаммын емдеу үшін үш эксперименталды препаратқа басымдық беруді ұсынды. Бұл туралы Reuters агенттігі хабарлады.

Перспективті кандидаттар тізіміне «Mapp Biopharmaceutical», «Regeneron» компанияларының әзірлемелері және «Gilead Sciences» компаниясы шығарған «Ремдесивир» вирусқа қарсы препараты енді. Дүниежүзілік ұйым бұл дәрі-дәрмектердің, сондай-ақ әлеуетті вакциналардың тиімділігін растау үшін міндетті клиникалық сынақтардан өтуі тиіс екенін атап өтті.

Сынақтан өтіп жатқан вакциналардың ішінде Халықаралық СПИД-ке қарсы вакцина бастамасы аясында әзірленіп жатқан бір дозалы «rVSV Bundibugyo» екпесі ең қолайлы өнім ретінде танылды. Дегенмен, сарапшылардың болжамы бойынша, бұл препарат алдағы тоғыз ай ішінде клиникалық сынақтарға дайын болмайды.

Сонымен қатар Қытай ғалымдары Эбола вирусының ең қауіпті түрлерінен, соның ішінде «Bundibugyo» штаммынан қорғауға қауқарлы кең спектрлі мРНҚ-вакцинасын әзірлеуде. Бірақ бұл жоба қазіргі уақытта зерттеудің бастапқы кезеңінде тұр.

Мамыр айының ортасында ДДҰ Конго Демократиялық Республикасы мен Угандадағы Эбола індетінің өршуін халықаралық маңызы бар төтенше жағдай деп жариялаған болатын.

Анықтамалық мәліметтерге сәйкес, «Bundibugyo» вирусы алғаш рет 2007 жылы тіркелген. Ол кең таралған «Zaire ebolavirus» штаммына қарағанда сирек кездеседі, алайда аз зерттелген және өлім-жітім көрсеткіші жоғары. Бүгінгі таңда бұл вирусқа қарсы арнайы ем жоқ, медициналық көмек тек демеуші терапиямен және асқынулардың алдын алумен шектеледі.

Еске сала кетейік, Эбола вирусы ауа-тамшы жолымен берілмейді. Инфекция тек ауру жұқтырған адамның биологиялық сұйықтықтарымен тікелей жанасу кезінде ғана жұғады. Қорғаныс шараларын сақтамаған жағдайда, медициналық қызметкерлер мен науқастарды күтуші адамдарға жұғу қаупі жоғарылайды.