Шығыс Қазақстанның ең үздік мәдениет және өнер қызметкерлері марапатталды

Өңірдің рухани келбетін айшықтап, өнер әлемінде озық үлгі көрсетіп жүрген мәдениет және өнер қызметкерлерінің кәсіби мерекесі Шығыс Қазақстан облысында жоғары деңгейде аталып өтті. Салтанатты шара Өскемен қаласының маңында орналасқан заманауи «The Forest» мейрамхана кешенінде ұйымдастырылды. Елдің мақтанышына айналған өнерпаздар мен шығармашылық зиялы қауым өкілдері бас қосқан бұл думанды кешке облыс әкімі Нұрымбет Сақтағанов арнайы қатысты. Бұл туралы Bizdiң Өskemen ақпарат агенттігі аймақ басшысының баспасөз қызметіне сілтеме жасай отырып хабарлайды.

Мерекелік жиын барысында Шығыс Қазақстанның мәдениеті мен өнерін дамытуға, аймақтың халықаралық және республикалық деңгейдегі оң имиджін қалыптастыруға өлшеусіз үлес қосқан сала үздіктеріне ерекше құрмет көрсетілді. Облыс әкімі Нұрымбет Сақтағанов өңір мақтаныштарына ведомстволық наградаларды, Алғыс хаттар мен Құрмет грамоталарын салтанатты жағдайда табыс етті. Өз сөзінде аймақ басшысы кітапхана мен музей саласының мамандарының, театр және музыка ұжымдарының ұлттық мұраны сақтау жолындағы еселі еңбектерін жоғары бағалады:

«Тамыры терең тарих пен тағылымға бай Шығыс Қазақстан – өнер мен руханияттың алтын бесігі. Әр ұйымдастырылған шара, әр қойылым, әр сурет пен кітап көрмесі – туған өлкеміздің рухани келбетін айшықтай түсетін игі еңбек. Қасиетті Шығыс өңірінің мәдениетін дамыту жолындағы еселі еңбектеріңіз үшін баршаңызға шынайы алғысымды білдіремін!», – деді ШҚО әкімі.

Өскемен іргесіндегі «The Forest» кешенінде өткен салтанатты кеш тек ресми марапаттармен шектелмей, жоғары деңгейдегі концерттік бағдарламаға ұласты. Жиналған қауым мен кеш қонақтары үшін отандық эстраданың жарық жұлдыздары Нұрлан Абдуллин мен Мақсат Рахмет, сондай-ақ облыстың белгілі шығармашылық ұжымдары өнер көрсетті. Шығыс Қазақстанның атын әлемдік және республикалық ареналарда асқақтатып жүрген жас таланттардың жетістіктері де бұл кеште ерекше назарға алынып, мақтанышпен атап өтілді.