Эбола қаупі: Конго құрамасы 2026 жылғы Әлем чемпионатына қатыспай қалуы мүмкін

Америка Құрама Штаттарының билігі Конго Демократиялық Республикасының футбол құрамасынан 2026 жылғы Әлем чемпионаты басталар алдында елге кіру үшін 21 күн бойы оқшаулау режимінде (карантинде) болуды талап етті. Бұл шешім аталған африкалық елде Эбола вирусының таралуына және санитарлық-эпидемиологиялық жағдайдың нашарлауына байланысты қабылданып отыр. DW ақпарат агенттігінің хабарлауынша, бұл талап орындалмаған жағдайда команданың АҚШ аумағына кіруіне тыйым салынуы мүмкін.

Ақ үйдің турнирге дайындық жөніндегі арнайы тобының жетекшісі Эндрю Джулиани мәлімдегендей, мемлекеттік органдар қауіпті инфекцияның ел аумағына енуіне және таралуына жол бермеу үшін барлық қажетті санитарлық шараларды қолданады. Ресми талаптан бас тарту құраманың әлемдік додаға қатысу мүмкіндігін шектеуі ықтимал.

Дүниежүзілік денсаулық сақтау ұйымының (ДДСҰ) соңғы есептеріне сәйкес, Конго ДР аумағында Эбола вирусын жұқтырудың 82 дерегі ресми расталып, 7 өлім жағдайы тіркелген. Сондай-ақ, індет белгілері бар тағы 750-ге жуық күдікті жағдай мен инфекциядан қайтыс болуы мүмкін 177 адамның өлімі зерттеліп жатыр.

ДДСҰ Бас директоры Тедрос Адханом Гебрейесустің баяндамасына сүйенсек, вирус жұқтыру қаупі Конго мемлекетінің ішінде «өте жоғары» деп бағаланып отыр. Сахарадан оңтүстікке қарай орналасқан Африка елдері үшін қауіп деңгейі жоғары болғанымен, жаһандық деңгейдегі эпидемиологиялық қатер әзірге төмен сипатта.

Конгодағы індеттің бетін қайтару және оқшаулау шараларын жүргізу елдің шығысындағы саяси тұрақсыздық пен қарулы қақтығыстарға байланысты күрделеніп отыр. Кейбір аймақтар бүлікші топтардың бақылауында қалуда, ал миллиондаған ішкі қоныс аударушылардың арнайы лагерьлерде тығыз орналасуы санитарлық бақылау орнатуға айтарлықтай кедергі келтіруде.