Еуропаны бағындырған ұжым және Түркістанның жаңа мәртебесі: Өңірде не өзгерді?

Киелі шаһарда Мәдениет және өнер қызметкерлері күніне орай мерекелік іс-шара ұйымдастырылып, сала мамандары марапатталды. Салтанатты жиынға Түркістан облысы әкімінің орынбасары Ертай Алтаев арнайы қатысып, жиналған қауымды кәсіби мерекесімен құттықтады.

Өз сөзінде облыс әкімінің орынбасары мәдениет пен өнердің мемлекет дамуындағы рөліне тоқталып, өңірде осы бағытта атқарылып жатқан ауқымды жұмыстарды атап өтті.

«Күні кеше ғана Түркі Мемлекеттері ұйымының бейресми саммитін абыроймен атқарып алдық. Елдің абыройын көтеретін осы игілікті істердің барлығы – сіздердің еңбектеріңіздің жемісі деп сеніммен айта аламын. Өңірде көптеген мәдениет ошақтары салынып, халыққа рухани қызмет көрсетіп келеді. Өткен жылдың өзінде аудан, қалаларда 6 мәдениет үйі пайдалануға берілсе, биыл 10 мәдениет ошағының құрылысы жүруде. Облыстық мәдениет мекемелері республикалық, халықаралық байқауларда өңір намысын қорғап, жүлдегерлер қатарынан көрінуде. Биыл «Конгресс холл» кешенінің «Алқоңыр» ансамблі Еуропада өнер көрсетіп, ел даңқын асқақтатты», — деді Ертай Кенжебекұлы.

Мерекелік шара аясында өңір мәдениетінің дамуына елеулі үлес қосқан сала мамандарына жоғары мемлекеттік марапаттар тапсырылды. Шара барысында үздіктерге «Ерен еңбегі үшін» медалі, «Мәдениет саласының үздігі» төсбелгісі, сондай-ақ Түркістан облысы әкімінің Құрмет грамоталары мен Алғыс хаттары табыс етілді.

Сонымен қатар, салтанатты жиында «AMANAT» партиясы Түркістан облыстық филиалының атқарушы хатшысының орынбасары Қалыйма Жантөреева сала мамандарын құттықтап, партия атынан Алғыс хаттар табыстады.

Кәсіби мереке қарсаңында өткен «Музейлер шеруі» байқауының қорытындысы да осы кеште жарияланды. Облыстық мәдениет басқармасының басшысы Ғалымжан Ерназаров байқау жеңімпаздарын марапаттап, жүлдегерлерге автокөлік пен бағалы сыйлықтарды салтанатты түрде табыс етті.

Мерекелік іс-шараның ресми бөлімінен кейін қонақтар назарына «Мәдениеттің көрінбес қырлары» атты арнайы промо-ролик ұсынылды. Шара «Алтын тамыр» би ансамблінің «Өнер» хореографиялық қойылымымен және отандық эстрада жұлдыздары Маржан Арапбаева мен Гүлнұр Оразымбетованың концерттік бағдарламасымен жалғасты.

Айта кетсек, Мемлекет басшысы Қасым-Жомарт Тоқаевтың Жарлығымен өткен жылы Түркістан қаласына ерекше мәртебе берілген болатын. Биыл Түркістан облысының құрылғанына 8 жыл толып отыр. Бүгінде өңірде облыс әкімі Нұралхан Көшеровтің бастамасымен мәдениет пен руханият саласын дамыту бағытындағы жүйелі жұмыстар өз жалғасын табуда.

Түркістан облысы әкімінің баспасөз қызметі