Ақпан айында ауа райы қандай болады?

«Қазгидромет» синоптиктерінің болжамына сәйкес, Қазақстан аумағында қыстың соңғы айы жылы әрі жауын-шашын мөлшері қалыпты деңгейде болады деп күтілуде. Ауаның орташа температурасы республиканың басым бөлігінде климаттық нормадан 1-2 градусқа жоғары болса, тек оңтүстік-шығыс өңірлерде норма шамасында сақталады. Жауын-шашын мөлшері елдің солтүстік-батыс жартысында, сондай-ақ оңтүстік, оңтүстік-шығыс және шығыстың таулы және тау бөктерлі аймақтарында нормадан көп болады деп болжануда.

Айдың алғашқы онкүндігінде еліміздің батыс және солтүстік-батыс аймақтарында, соның ішінде Ақтөбе облысында түнде ауа температурасы -23...-28 градусқа дейін төмендеп, кейін -10...-20 градусқа дейін әлсірейді. Солтүстік, орталық және шығыс өңірлерде бастапқыда температура -4...+1 градусқа дейін көтерілгенімен, кейін түнде -18...-28 градусқа дейін салқындауы ықтимал. Ал оңтүстік өңірлерде ауа райы айтарлықтай құбылмалы болып, күндізгі температура +3...+10 градустан +8...+17 градусқа дейін ауытқып отырады.

Жалпы ақпан айында еліміздің солтүстік жартысында негізінен қар жауса, оңтүстік және оңтүстік-батыс аймақтарда жаңбыр мен жылбысқы қар күтіледі. Айдың 20-сына дейінгі кезеңде солтүстік, орталық және шығыс аймақтарда түнде -30...-35 градусқа дейін жететін аязды күндер болжануда. Сонымен қатар ай бойы республиканың бірқатар өңірлерінде тұман түсіп, көктайғақ болуы және желдің күшеюі сияқты қауіпті метеорологиялық құбылыстар байқалуы мүмкін.